በኮቪድ 19 ዘረ-መል ላይ ጥናትና ምርምር ሊከናወን ነው፡፡
በኮቪድ 19 ዘረ-መል እና ተያያዥ ርዕሰ ጉዳች ላይ ያተኮረ ሳይንሳዊ የምርምርና ጥናት የማስጀመሪያ መርሀ-ግብር ፕሮግራም በዛሬው እለት በኢትዮጵያ ህብረተሰብ ጤና ኢንስትቲዩት የስብሰባ አዳራሽ ተከናወነ፡፡
ዶ/ር ጌታቸው ቶሌራ የኢትዮጵያ ህብረተሰብ ጤና ኢንስትቲዩት ም/ዋና ዳይሬክተር በወርክሾፑ መክፈቻ ላይ ባደረጉት ንግግር ይህንን ጥናትና ምርምር በመሪነት የሚያከናውኑት የኢትዮጵያ ህብረተሰብ ጤና ኢንስትቲዩት እና የአርማወር ሀንሰን የምርምር ኢንስትቲዩት በጋራ መሆኑን አስረድተው ሁለቱ ተቋማት በቅንጅትና በትብብር መንፈስ ለመስራት መነሳሳታቸው እጅግ አስፈላጊና ተገቢ መሆኑን አመልክተዋል፡፡ የሁለቱ ኢንስትቲዩቶች በጋራና በቅንጅት መስራት ተቋማቱ ያላቸውን መረጃዎችና ሀብቶች (ማለትም የባለሙያ፤ የላብራቶሪ ግብዓቶች፤ ፋይናስንና የመሳሰሉትን በተመለከተ) በተገቢው መንገድ መጠቀም እንዲችሉ እንደሚያግዝ አስረድተዋል፡፡ ም/ዋና ዳይሬክተሩ አይይዘውም ይህ በጋራ መስራት በሀገር አቀፍ ደረጃ የሚኖረው ጠቀሜታ እጅግ የጎላ በመሆኑ ወደፊትም በመሰል ጥናቶች ላይ ተጠናክሮ መቀጠል እንዳለበት አሳስበዋል፡፡
ዶ/ር አለምሰገድ አብዲሳ የአርማወር ሀንሰን የምርምር ኢንስትቲዩት ም/ዋና ዳይሬክተር በበኩላቸው ባደረጉት ንግግር ኮቪድን የሚያመጣው ቫይረስ በየጊዜው ባህሪው እየተቀያየረ የሚሄድ በመሆኑ የሚያስከትለውን ጉዳት መነሻ ለማወቅ እንዲቻል ሁለቱ ተቋማት በጋራና ቅንጅት ይህንን ጥናትና ምርምር እንደሚያከናውኑ አስታውቀዋል፡፡ በኢትዮጵያ ህብረተሰብ ጤና ኢንስትቲዩት ተመራማሪ የሆኑት አቶ አበፅሀ አብርሃ እና በአርማወር ሀንሰን የምርምር ኢንስትቲዩት ተመራማሪ የሆኑት ዶ/ር አንዳርጋቸው ሙሉ በበኩላቸው ስለጥናቱና ምርምር ስራው ለወርክሾፑ ተካፋዮች ሠፋ ያለ ገለጻ አድርገዋል፡፡ በኮቪድ 19 ዘረ-መል እና ተያያዥ ርዕሰ ጉዳች ላይ የሚደረገው ጥናት በኢትዮጵያ ህብረተሰብ ጤና ኢንስትቲዩት እና በአርማወር ሀንሰን የምርምር ኢንስትቲዩት የጋራ ቅንጅት እንዲሁም ሁሉንም ክልሎች፤ በመላው ሀገሪቱ የሚገኙ 14 ዩኒቨርስቲዎችንና የአፍሪካ ሲዲሲን ባካተተ መልኩ የሚከናወን መሆኑን ለማወቅ ተችሏል፡፡
ይህ ጥናትና ምርምር ሙሉ በሙሉ በኢትዮጵያውያን የሚከናወን ሲሆን የጥናትና ምርምሩ ግራንት ከአፍሪካ አሸናፊ ከሆኑት ሰባት የምርምር ግራንቶች መካከል አንዱ መሆኑን ለማወቅ ተችሏል፡፡
