የባዮሴፍቲ(ደሕንነተ ህይወት) ያተኮረ ስልጠና ለኢንስቲትዩቱ ሰራተኞች እየተሰጠ ነው
የኢንስቲትዩቱ የብሔራዊ ላቦራቶሪዎች እቅም ግንባታ ዳይሬክቶሬት የባዮሴፍቲ(ደሕንነተ ህይዎት) እና የባዮሴኪዩሪቲ (የስነ-ህይወት ጥበቃ) አስመልክቶ ለኢንስቲትዩቱ ሰራተኞች ከጥር 7 እስከ 9/2012 ዓ.ም በአዳማ ከተማ በድሬ ሆቴል ስልጠና እየሰጠ ይገኛል፡፡
የስልጠናው ዋና አላማ የኢንስቲትዩቱን ሰራተኞች ስለ አደገኛ በሽታ አምጪ ተህዋስያን፤ ኬሚካል አያያዝ፣ አወጋገድ እና የስራ ላይ ደህንነት የእውቀት ደረጃቸውን ከፍ በማድረግ እራሳቸውን ፣ ሕብረተሰቡን እና አካባቢውን አደገኛ ከሆኑ በሽታ አምጪ ተሕዋስያን እና ኬሚካሎች እንዲጠብቁ ለማድረግ የግንዛቤ ማስጨበጫ ስልጠና ነው፡፡
ዶ/ር ኢዮብ አበራ የላቦራቶሪ ባዮ ሴፍቲ እና ባዮ ሴኪዩሪቲ ቡድን ኃላፊ በስልጠናው የመክፈቻ ስነ-ስርዓት ወቅት እንደገለጹት ኢንስቲትዩቱ የተለያዩ የላቦራቶሪ ምርምር የሚካሄድበት ተቋም ከመሆኑም በላይ ከተለያዩ ቦታዎች የተለያዩ የምርምራ ናሙናዎች መጥተው የሚሰራበት ከመሆኑ ጋር ተያይዞ ከአያያዝ እና ከአወጋገድ ጥንቃቄ ጉድለት የተነሳ በሰራተኛው፣በሕብረተሰቡና በአካባቢው ላይ ከፍተኛ ጉዳት ሊያደርሱ ይችላሉ ብለዋል፡፡
ስለሆነም የኢንስቲትዩቱ ስራተኞች የተለያዩ ተሕዋስያን እና ኬሚካሎችን አያያዝና አወገገድ አስመልክቶ የተሻለ እውቀት እንዲኖራቸውና እራሳቸውን፣ ሕብረተሰቡንና አካባቢውን ለመጠበቅ እንዲችሉ የግንዛቤ ማስጨበጫ ስልጠና አስፈላጊ ሆኖ መገኘቱን እና ስራተኛው የተሕዋስያን እና የኬሚካሎችን አያያዝና አወጋገድ መመሪያዎችን ተከትለው በጥንቃቄ የሚሰሩ ከሆኑ ከራሳቸውም በላይ ሕብረተሰቡንና አካባቢውን የሚጠብቁ በመሆኑ በዘርፉ ባለሙያዎች ስልጠናው እየተሰጠ መሆኑን ሃላፊው አያይዘው ገልጸዋል፡፡
ስልጠናው የተሕዋስያን መተላለፊያ መንገዶች እና ሊወሰዱ የሚገባቸው ጥንቃቄዎች ፣የሰውነት መከላከያ መሳሪያዎች አጠቃቀም፣ የኬሚካል አያያዝና አወጋገድ፣ አደገኛ ቆሻሻ አያያዝና አወጋገድ ፣የላቦራቶሪ መሳሪያዎች አጸዳድና ከብክለት ነጻ የሚደረጉበትን ዘዴዎች እና በስራ ወቅት ሰራተኞች ሊያድርጉ የሚገባቸው ጥንቃቄ ላይ መስረት ያደረገ ሲሆን በገለጻና በተግባር የስልጠና ስነ-ዘዴ እየተሰጠ ይገኛል፡፡
